تحررت ليبيا من الظلم و الطغيان وفرحنا فعبرنا عن فرحتنا بكتابة القصائد والأغاني تخليدا للذكرى العظيمة وتحفيزا للشعب على البناء ونسيان الأحقاد بعد تحقيق العدالة. ما حدث بعد ذلك فهذا شأن آخر.. هذه قصيدة غنائية من كتابي من أضعف الإيمان يدي في يدك
بقلم فتحي أبو القاسم العماري
يا ليبي خذ يدي فيدك
خلينا نمشي لقدام
يا ثائر قوللي من قدك
من ضربك طاحت لصنام
راح الظلم معاه أعوانه
و الزمزاكه و الخوانه
يا ليبي خذ يدي في يدك
خلينا نمشي لقدام
يا ليبي خلينا نبني
كل اللي في الوطن انهد
خلينا نبني ونشيد
و الدنيا ما ترجى حد
غايتنا نحقق لامان
خلينا نبني الإنسان
يا ليبي خذ يدي في يدك
خلينا نمشي لقدام
يا ليبي خلينا نسامح
كل اللي نادم مهموم
و اللي يمدلنا ايده نصافح
لكن ما ننسى المظلوم
ياخذ حقه ونواسيه
و من خير بلادي نعطيه
يا ليبي خذ يدي في يدك
خلينا نمشي لقدام
بقلم/ الدكتور فتحي الغماري
